تلفون : 83741732 بريد الكتروني :Contact@akhirlahza.net فاكس : 83793073 - 83740992
الخرطوم ,

ثالثة الأثافي

 

راي: بت محمود

  وتتزايد وتيرة (التشعيب) الشعبي، ما الشعبي الحزب الكان هو والمؤتمر الوطني أخوان واتشاكلوا وختوه قر وتااني رجعوا اتصالحوا، عاد يا أخواني الداخل بين الأخوان مارق نحن الرجرجة والدهماء ديل البدخلنا بين التورتة والكريم شانتي أأقصد البصلة وقشرته شنو،  أريته هي بصلة السرور لكن خشمي عندي غايتو أهاا

أنا كنت بقول في شنو ايوا قلت الشعب غضبان، وزعلان بسبب هذه الخطة السنوية العجيبة إذ أعقبها ارتفاع جنوني في الأسعار، والله الجن محترم وعيب نشبهه بالأسعار الفلكيه دي .

 يعني لمن يتم وضع خطة بهذا الشكل لا تقابلها زيادة في الأجور لا وكمان بتقولوا مافي زيادة، لأن أرتفاع الأسعار غير مبرر !! سبحان الله طيب أنتو شنو والسوق ده البلجمو منو؟

وكمان بتصرحوا مابنتراجع وشنو مابعرف ماتتراجعوا لكن ده وضع مابستقيم نتيجته الحتميه قلناها ورددناها كتير، أن الكبت يولد الانفجار، مش الكبت وبس ومعاه تصريحات منسوبي الحكومة ده موضوع تاني ماعرفنا نسميه شنو يللا، بعد التصريحات دي ما نسمع جماهير شعبنا الأبية الصامدة الصابرة وشنو مابعرفوا داك.

انتو ماخليتو فيها صبر وزول راضي عن موازنتكم دي مافي. الراضين عنكم هم أولاد المصارين البيض فقط، لأنه مافارقه معاهم ولو الرغيفة حصلت عشرة جنيهات خاطبوا ديل بس لكن ماعندكم شغله في الغالبية العظمى من هذا الشعب، بعدين التمثيلية بتاعت استدعاء وزير المالية من قبل البرلمان والمجلس التشريعي دي ماوقعت لي كله كله يعني شنو؟  هل وزير المالية ده قطع الكلام ده من رأسه؟ أبداً اجتمعوا وانفضوا ولجان انبثقت منها لجان وطلعوا بي حنظل القيزان الاسمه موازنه ده..  يبقى ماتضيعوا للرجل وقته الثمين استدعاء قال على كده استدعوا مجلس الوزراء كله.

وسؤال لنواب البرلمان عليكم الله بتقدروا تقابلوا منتخبيكم كيف وبي ياتو وش تاني بس أوعى تكونوا صفقتوا عند إجازة  الخطة المالية السنوية، يللا بعد ده اخبرونا الصبر من وين بشتروه .. ده دمار وخراب بيوت عشان كده أكثروا من زراعة أشجار النيم عشان كفاتير الشاي سوف تتكاثر بسبب ازدياد نسبة الطلاق وهروب الازواج من المسؤولية وبعد ده تقولوا الشعب السوداني الصابر المجاهد عن أي شعب تتحدثون كدى اتفضلوا معانا فتة موية فول، وبعدين نشوف كلامكم الما بخلص ده .

قراء 298 مرات

صفحتنا على الفيسبوك

الى الاعلي