تلفون : 83741732 بريد الكتروني :Contact@akhirlahza.net فاكس : 83793073 - 83740992
الخرطوم ,
اندياح - داليا الياس

اندياح - داليا الياس (133)

أهو كان حلم!!

 

(هو كان حلم)
بس قلبى منك ماسلم
رغم المسافات والظروف
مشتاقة ليك وإنتا المهم
خلينى جواك زى زمان
بيناتنا ما إنقطع العشم
محتاجة بالك لى يطول
تهواني لكن بي فهم
البينى بينك سر نبيل
وإحساس على القلب إترسم
وأنا من عرفتك ياجميل
ودعتا أطياف الوهم
والواقع أصبح بيك نضير
والدنيا موسيقى ونغم
بس كنتا عارفك طيف خيال
مرات حلم مرات علم
وأنا قلبى منك ماااااااسلم!
**
قصة هواك والذكريات
ساقوني لى حد الجنون
وبقيت مقسم كلو يوم
 بين الهواجس والظنون...
يالبيك ربيع عمرى بيطول
يوم فرقتك شفتا المنون
غرد معاك عصفور هناي
لكن وراك هجر الغصون
علمتنى الحب والهيام
ووريتني فى الخذلان فنون
وزي ماضحكتا كتير معاك
الليلة بكيت العيون
وزى ماعرفتا تسيب هواي
أنا غير هواك ببقى وبكون
ولو هانت الأيام عليك
شخصك على خاطرى بيهون
بس قلبى منك ما سلم
***
جرحك بيتاور في حشاي
لا إرتحتا منو ولا شفيت
وأنا يوم طريت حبى الكبير
من غير شعور نحتا وبكيت
خاطري الكسير يوم ما إنجبر
 لاقدرتا أطرى ولا نسيت
حاولتا ياما كتير معاك
وجريت وراك لامن حفيت
جنيت بلاك والله عديل
لا عرفتا رقتا ولاهديت...
شمتا كل الناس علي
وبقيت حكاية في كل بيت
أنا كنتا راضيه أعيش معاك
لكنك إنتا الما رضيت
باريت غرورك والضلال
وبقيت أنانى وإفتريت
وأنا قدر ما أديك حنان
ألقاك مع الأيام قسيت
قدامى ماخليت خيار
لملمتا أحزاني ومشيت
وسبتك وراي للحسرة والخوف والندم
والظالم الجواك تراجع وإنهزم
وأنا هسه فقتا من الوهم
بس قلبى منك....ماااااااسلم
تلويح:
نحن لا ننسى....ولكننا نجتر الذكريات لنصنع من أخطائها واقعاً أفضل

صفحتنا على الفيسبوك

الى الاعلي