تلفون : 83741732 بريد الكتروني :Contact@akhirlahza.net فاكس : 83793073 - 83740992
الخرطوم ,

حضرتا !!

  حضرتا ولم أجد محياك....وماجيتك براي ... لكن....حلم بكرة المعاك...هو الجاك...ورجع مأسوف مع الأشواق....وعربد بين ضلوعي هواك...ومرت بي ليالي اللهفه فوق وسادة  الأشواك..أريتك لو تعرف الشوق... وفرحة روحي يوم تلقاك...وتفهم إني بصحا وأنوم...ومافي خاطري غير ذكراك...وأجيك بي كل مشاعر الريد....وما يلقاني إلا جفاك...غريبة الدنيا لما تقوم....عجيبة....عصية الإدراك....شنو الغير غرامنا الكان؟....ومين ياغالي بس قساك؟وبدل طيبة الإحساس......وختا مكانها جور وهلاك؟منو السكنتو بدلي الروح.....منو الطلعني من جواك؟منو الساقك بعيد عني.....منو الجذبك....منو الأغواك؟وكيف عرف الغموض الفيك....وكيف أرضاك؟وجاب من وين مفاتيحك.....وأنا القايلاك براى حافظاك!منو السرق الحنان الفيك....ومن إحساسي وين دساك؟وحاتك مهما تقسى علي...تزيد جواي معاني غلاك...وتمشي بعيد وأمشي عليك....قدر ماتجري أجري وراك...معلق قلبي في طرفك....محال ياسيدو يوم ينساك...ولااااا ممكن أسيبك يوم.....وحاة الخالق السواك...وعارفك بكرة راجع لي... وعارف إني روح دنياك...وإنك مهما يوم طشيت....حيفضل دربى بس ممشاك...كتير فكرتا تغدر بي....وطريت قلبي الدوام دفاك...رجعتا وتبتا جيت ندمان....عرفتا غلاوة الحباك...ومهما كنتا يوم مشغول ..بيكون طيفي وحناني معاك...وبصبر جد على الهجران....مسامحك وصبري كلو فداك...وباكر ترجع الأفراح.......تعود أيام .يسوقك مني مرة الهم....وأنا وإحساسي نترجاك...حضرتا....ولم أجد محياك...حضرتا....ولازم أستناك..أريتك!!ده المتوقع...!!ده المتوقع...لما تكون مستغني وجاحد...يبقى الواجب زولك يقنع...ويبعد عنك ..وينسى الفكرة...وأوعا يحن فى يوم أو يرجع...أصلك ياما قسيت ونسيتو..وكم ختيتو في وش المدفع...وكم ناداك بالصوت العاليلا رديت...لاحتى بتسمع...وتطرح في أشواق الريدة...وسبتو براهو يعاني ويجمع...وكان بيسقيك الكاس الحالي...وكان لي مرك يشرب ويجرع....ده المتوقع...بكرة حيلقي حبايب أنبل...أفضل منك...وأسمى...وأرفع...***ماتتخيل تصبح جائر وزولك يصبر...مهما طول بالو وسامح....لازم حبل الريدة حيقصر...ويبدأ يشوف الصورة الواضحة...ويلقى مشاعرو بدت تتبخر...ضغط الذل لو زاد عن حدو...حتما" زولك يوم يتفجر...ويهرب من دنياك وغرورك....وإنتا براك حتعاني وتخسر...عزة نفس الريد الصادق...من جبروت إحساسك أكبر...ومهما تكون في قلبو محبة.... بكرة أكيد بالقسوة حتصغر...وتعرف إنك كنتا أناني....وتندم ياما وتجي تتحسر... وتطرا حبيبك وقلبو الحاني... وكيف كان دربك زاهر وأخضر..ولو فكرتا تعيد الماضى... كيف حتعيد الكان إتكسر؟!إنتا براك بددتا كنوزك....وماقدامك غير تتصبر...يامسكين الريدة قدرنا....والمكتوب فى جبينها بيظهر...لكن لازم نحن نصونها...وزولنا يكون جوانا محكر...نخلص ليهو وبيو نهتما....لا نتراجع لانتأخر.. وليو نتمنى سعادة الدنيا....لا يتأزم لا يتوتر...وحتى الكلمة الجارحة نسيبها...علشان خاطرك مايتأثر... ياخ الريد الصادق نادر....لابيتعوض لابيتكرر****وده المتوقع...لما تكون فى ريدك ظالم...وزولك ديمة مسامح وحالم...لازم يزهج يوم ويغادر...ويعمل رايح ويعمل نايم..تلويح:حين تشعل النيران...لاتتوقع سوى الحرائق الكبيرة
قراء 129 مرات

صفحتنا على الفيسبوك

الى الاعلي