تلفون : 83741732 بريد الكتروني :Contact@akhirlahza.net فاكس : 83793073 - 83740992
الخرطوم ,
خارج الصورة - عبد العظيم صالح

خارج الصورة - عبد العظيم صالح (129)

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

أمركوا الجنيه

 

٭ كثيرة هي نكات المدرسين السودانيين والذين شكلوا حضوراً كبيراً باليمن في ثمانينات وتسعينات القرن المنصرم  ..
٭ تصاعد الدولار الأمريكي أمام الجنيه السوداني والذي أضحى بلا قوة تذكر .. ذكرني بنكتة المدرس السوداني في اليمن، والذي لبى دعوة غداء في مناسبة عرس.. اليمنيون كرماء ويظهرون احتفاءً واضحاً بالضيف وإكرامه.. ومن عاداتهم تفقد الضيف والوقوف على حاجاته..
٭ والمائده عندهم تبدأ بتقديم الحساء وهو ساخن.. ويقولون له (المرق).. وعندما يقولون مرٍّقوا مصطفى .. أي أعطوا مصطفى مرقاً .. أحد اليمنيين واسمه صالح من أصحاب الدعوة صاح (مرِّقوا الأستاذ السوداني) وعلى الفور نهض زولنا واقفاً وهو يقول: (ما في زول إقرب لي بمرق براي).
٭ فعلي منوال هذا الوزن.. الجنيه السوداني (مرقوه) وهنا ليس المقصود إكرامه وإعطاءه مرق.. ولكن امرقوه شوية.. خلوه اتفسح بره.. إشم هواء وإجي راجع.. ويحضر كم ورشة تدريبية في ماليزيا أو تركيا لنقل التجربة.. امرقوا ( الجنيه) ده ( مرق جلدو من صفحتو) امرقوا إشوف العملات شغالة كيف.. عملات طالعة فوق.. رافعه رأسها في السماء ما بتخاف من أي عملة مهما كانت قيمة (مويتها الذهبية) والماضيها منو.. بالمناسبة الجنيه الحايم الماضيه منو؟ أنا ما بتذكر وإنت كمان ناسي.. فالجنيه ما ترك لينا نفس عشان نشوف ( خلقتو) ، امرقوا الجنيه التعيبان السجيمان الفتيران التقول مربوط ما بياكل.. امرقوا خلوه إشوف العملات بره كيف (بداوس).. عملات ( عضلات تبش يا صاحبي)....مرقوا الجنيه الجبان ده.. وأسالوه البخوفك شنو من الدولار..؟ كل ما يحزموك وإلزموك تجينا جاري. تجري بطنك.. يا الفاضحنا ومخجلنا مع عملات العالم . القوي منها والضعيف  الصغير والكبير.. ياخي مالك..؟ كلمنا الحاصل ليك شنو؟ كل يوم بارك لينا.. ابركن كرعيك..
٭ يا جنيه مالك كلمنا مرضك شنو؟ نجيب ليك إسعاف؟ نوديك انعاش؟ نديك درب؟ إمكن تقوم فأر ترترب.؟ ولا شنو؟ يا جنيه  يا تعبان.. نعمل ليك شنو؟ نعومك؟ نخلي أحمد الجابري يغني ليك في بحر حلتنا نعوم.. حتي لو قلنا نعومك.. انت بتعرف تعوم؟ أنا خايف أول ما (نختك) في الموية تغرق لينا.. إنت يا جنيه يا كحيان قايل العوامة دي ساهله  إنت قايل بتعوم براك؟ ولا في طرف ( القيفة) لا يا حبيب لو فاكر كده تكون غلطان.. العوامة ذاتها فن وعلم وذوق وتربية ودي كلها يا جنيه فقدتها.. والعوامه دي مع عملات كثيرة وأمامك واحدة من اثنين ( يا غرق يا جيت حازما).
٭ أها تاني نعمل ليك شنو ؟نربطك بي سلة.. سلة عملات؟ لا دي ما بتقدر عليها.. دي دايره مؤهلات قدرات.. دي بتلمك بعالم ( بره).. ودي دايره لغات.. دايره إنجليزي. يا جنيه.. انت عربي ما عندك.. عربي جوبا ما عندك.. سلات شنوا البنربطك بيها.. إربط حلقك زي ما نشفت حلوقنا..
٭ تاني فضل آخر إطلاقة يا جنيه يا سوداني.. تاني مافي غيرها.. انت مش ( طبعت) مع أمريكا.. مش رفعت العقوبات.. مش اجتمعت مع ناسك.. مش انتوا ماشين تحبوا أمريكا وتاني ما بتهددوها بدنو العذاب؟ مش ومش ومش؟
٭ طيب رأيك شنو يا جنيه لو خليناك أمريكي.. مش ناس مننا بقوا (أمريكان) طيب فيها شنو. لو دمجناك مع الدولار ( نظام خالف وكده) وسميناك الدولار الأمريكي وأمركناك، تاني في مشكلة؟ في زول تاني ببيعك.؟
٭ رأيك شنو يا جنيه تبقي لينا دولار.. دولار عندك صلعه وأمريكي كمان.

صفحتنا على الفيسبوك

الى الاعلي